ಶತಚಂಡಿಕಾ ಯಾಗ

ಕಟೀಲು : ಪುರಾಣ ಪ್ರಸಿದ್ಧ ಶ್ರೀ ದುರ್ಗಾಪರಮೇಶ್ವರೀ ದೇಗುಲದಲ್ಲಿ ತಾ.೨೬ರ ಭಾನುವಾರ
ಡೆಕನ್ ಕ್ರಾನಿಕಲ್ ಮಾಲಕರಾದ ಶಾಂತಿಪ್ರಿಯದರ್ಶಿನಿ ಹಾಗೂ ವಿನಾಯಕರವಿ ರೆಡ್ಡಿ
ದಂಪತಿಗಳ ಸೇವಾ ರೂಪದ ಶತಚಂಡಿಕಾ ಯಾಗ ನಡೆಯಲಿದೆ.
ಕಟೀಲು ದೇವರ ಮೂಲಸ್ಥಾನವಾದ ಕುದುರು ಭ್ರಾಮರೀ ವನದಲ್ಲಿ ಶತಚಂಡಿಕಾಯಾಗ ನಡೆಯಲಿದೆ
ಎಂದು ಪ್ರಕಟನೆ ತಿಳಿಸಿದೆ.

ಕಟೀಲಿನಲ್ಲಿ ಸಂಭ್ರಮಿಸಿದ ಚಿತ್ರಕಲಾರಾಧನೆ ವರ್ಣನಂದಿನೀ

ಕಟೀಲಿನ ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದಲ್ಲಿ ನಂದಿನಿ ನದಿಯ ಬಂಡೆಗಳಲ್ಲಿ, ರಥಬೀದಿಯಲ್ಲಿ, ಗೋಪುರದ ಮುಂದೆ ಹೀಗೆ ಅಲ್ಲಲ್ಲಿ ಕೂತ ಕರಾವಳಿಯ ಪ್ರಸಿದ್ದ ಇಪ್ಪತ್ತೈದು ಕಲಾವಿದರು ಚಿತ್ರ ಬಿಡಿಸುತ್ತಿದ್ದರು. ಕಟೀಲು ದೇವಸ್ಥಾನ, ಭ್ರಾಮರೀ, ರಕ್ತೇಶ್ವರೀ ಕಲ್ಲು, ನಂದಿನಿ ನದಿ, ಭ್ರಮರ ಹೀಗೆ ಅನೇಕ ಚಿತ್ರಗಳು ಖ್ಯಾತ ಕಲಾವಿದರಾದ ರಾಜೇಂದ್ರ ಕೇದಿಗೆ, ಸಯ್ಯದ್ ಆಸಿಫ್ ಅಲಿ, ದಿನೇಶ್ ಹೊಳ್ಳ, ತಾರಾನಾಥ ಕೈರಂಗಳ, ಸಪ್ನಾ ನೊರೊನ್ಹ, ಪೆರ್ಮುದೆ ಮೋಹನ್ ಕುಮಾರ್, ಆಶಾ ಶೆಟ್ಟಿ, ಹರೀಶ್ ಕೊಡಿಯಾಲ್‌ಬೈಲ್, ಜೀವನ್ ಕುಮಾರ್, ತ್ಯಾಗರಾಜ್, ಶಬ್ಬೀರ್ ಅಲಿ, ಪ್ರಮೋದ್ ರಾಜ್, ಸತೀಶ್ ರಾವ್, ಲಕ್ಷ್ಮೀನಾರಾಯಣ, ಸುಧೀರ್ ಕಾವೂರ್, ರಾಮಚಂದ್ರ ಕಾಮತ್, ರೇಶ್ಮಾ ಶೆಟ್ಟಿ, ಸುಧಾ ನಾಯಕ್, ರಚನಾ ಸೂರಜ್, ರೇಣುಕಾ, ನಾರಾಯಣ, ನವೀನ್ ಚಂದ್ರ, ನಿಶಾ, ಜಯಶ್ರೀ, ಲಕ್ಷ್ಮೀ ಬಿಜಿಲಿಯವರಿಂದ ಮೂಡಿ ಬಂದವು.
ಭಾನುವಾರ ಕಟೀಲು ದೇವರ ಸನ್ನಿಧಿಯಲ್ಲಿ ನಂದಿನಿ ನದಿಯಲ್ಲಿ ಶ್ರೀ ಭ್ರಾಮರೀಗೆ ನಡೆದ ಚಿತ್ರಕಲಾರಾಧನೆ ವರ್ಣ ನಂದಿನಿಯನ್ನು ಆಯೋಜಿಸಿದ್ದು ಝೇಂಕಾರ ಬಳಗ. ಸಹಕಾರ ನೀಡಿದ್ದು ಕರ್ಣಾಟಕ ಬ್ಯಾಂಕ್.
ನದಿಯ ಸ್ವಚ್ಛತೆ, ರಕ್ಷಣೆಯ ಜಾಗೃತಿ, ಕಲಾವಿದರಿಗೆ ಪ್ರೋತ್ಸಾಹ ಇದರ ಜೊತೆಗೆ ಚಿತ್ರಕಲೆಯ ಮೂಲಕ ಭ್ರಾಮರಿಯನ್ನು ಆರಾಧಿಸುವ ವಿಶಿಷ್ಟ ಕಲ್ಪನೆಯ ಕಾರ‍್ಯಕ್ರಮ ಇನ್ನಷ್ಟು ನಡೆಯಲಿ ಎಂದು ಶುಭ ಹಾರೈಸಿ, ಕಾರ‍್ಯಕ್ರಮವನ್ನು ಚಿತ್ರ ಬಿಡಿಸಿ ಉದ್ಘಾಟಿಸಿದವರು ಕರ್ಣಾಟಕ ಬ್ಯಾಂಕಿನ ಡಿಜಿಎಂ ಕೆ.ಜಿ.ರಮೇಶ್.
ಶುಭ ಹಾರೈಸಿದ್ದು ದೇಗುಲದ ಮೊಕ್ತೇಸರರಾದ ವಾಸುದೇವ ಆಸ್ರಣ್ಣ ಮತ್ತು ಅರ್ಚಕರಾದ ಹರಿನಾರಾಯಣದಾಸ ಆಸ್ರಣ್ಣ.
ಸಮಾರೋಪ ಕಾರ‍್ಯಕ್ರಮದಲ್ಲಿ ಕಲಾವಿದರು ತಾವು ರಚಿಸಿದ ಕಟೀಲು ದೇಗುಲದ ಅರ್ಚಕರೂ, ಝೇಂಕಾರ ಬಳಗದ ಅಧ್ಯಕ್ಷರೂ ಆದ ಅನಂತಪದ್ಮನಾಭ ಆಸ್ರಣ್ಣರ ಮೂಲಕ ದೇಗುಲಕ್ಕೆ ಅರ್ಪಿಸಿದರು. ಚಿತ್ರಕಲೆಯ ಮೂಲಕ ದೇವಿಯ ಸೇವೆಗೈದ ಎಲ್ಲರನ್ನೂ ಅಭಿನಂದಿಸಿದ ಅನಂತ ಆಸ್ರಣ್ಣ, ಈ ಚಿತ್ರಗಳನ್ನು ದೇಗುಲದಲ್ಲಿ ಇರಿಸಲಾಗುವುದು ಎಂದರು. ಲಕ್ಷ್ಮೀನಾರಾಯಣ ಭಟ್ ಕಾರ‍್ಯಕ್ರಮ ನಿರೂಪಿಸಿದರು. ಲಿಂಗಪ್ಪ ಕಟೀಲು, ನವೀನ್ ಕುಮಾರ್ ಉಪಸ್ಥಿತರಿದ್ದರು.
ಚಿತ್ರ : ಕಟೀಲ್ ಸ್ಟುಡಿಯೊ

ಕ್ರಿಕೆಟ್

ಕೊಂಡೇಲ ತರುಣ ವೃಂದದ ಆಶ್ರಯದಲ್ಲಿ ನಡೆದ ಕ್ರಿಕೆಟ್ ಪಂದ್ಯಾಟದಲ್ಲಿ ವಿಜೇತ ಮರು ಫ್ರೆಂಡ್ಸ್ ಜೋಕಟ್ಟೆ ತಂಡ ಪ್ರಶಸ್ತಿ ಪಡೆಯಿತು. ಜಿ.ಪಂ.ಸದಸ್ಯ ಈಶ್ವರ್, ಗುರುರಾಜ್, ಶಂಕರ ಪೂಜಾರಿ, ತಾರಾನಾಥ ಶೆಟ್ಟಿ ಮತ್ತಿತರರಿದ್ದರು.

kondela friends

ಶಂಕುಸ್ಥಾಪನೆ
ಕಟೀಲು : ಇಲ್ಲಿನ ಕೊಂಡೇಲ ತರುಣ ವೃಂದವು ನಿರ್ಮಿಸಲುದ್ದೇಶಿಸಿರುವ ನೂತನ ಕಟ್ಟಡಕ್ಕೆ ಕಟೀಲು ದೇಗುಲದ ಅರ್ಚಕ ಅನಂತಪದ್ಮನಾಭ ಆಸ್ರಣ್ಣ ಶಿಲಾನ್ಯಾಸಗೈದರು. ಸಂಘದ ತಾರಾನಾಥ ಶೆಟ್ಟಿ, ಮೋಹನ ಬಂಗೇರ, ಭಾಸ್ಕರ್, ರಾಜು ಕೊಂಡೇಲ, ರವಿ, ಶಂಕರ ಮತ್ತಿತರರಿದ್ದರು.

ಬೀಳ್ಕೊಡುಗೆ

ಕಟೀಲು :ವಿಜಯಾ ಬ್ಯಾಂಕಿನಲ್ಲಿ ೩೬ವರ್ಷಗಳಿಂದ ಕಾರ‍್ಯನಿರ್ವಹಿಸುತ್ತಿದ್ದ ಅಶೋಕ ಕರ್ಕೇರ ನಿವೃತ್ತರಾದ ಹಿನ್ನಲೆಯಲ್ಲಿ ಕಟೀಲು ವಿಜಯಾ ಬ್ಯಾಂಕ್ ಶಾಖೆಯಲ್ಲಿ ಬೀಳ್ಕೊಡುಗೆ ಸಮಾರಂಭ ನಡೆಯಿತು. ಶಾಖಾ ಪ್ರಬಂಧಕ ಭುವನೇಶ್ ಹೆಗ್ಡೆ, ಸಿಬಂದಿಗಳು ಅಭಿನಂದಿಸಿದರು.

ಕಟೀಲು : ಯಾತ್ರಿ ನಿವಾಸದ ಅನುದಾನ ವಾಪಾಸ್?

ಕಟೀಲು : ಪುರಾಣ ಪ್ರಸಿದ್ಧ ಭ್ರಾಮರೀ ದುರ್ಗಾಪರಮೇಶ್ವರೀ ದೇಗುಲದಲ್ಲಿ ಪ್ರವಾಸೋದ್ಯಮ ಇಲಾಖೆಯಿಂದ ನಿರ್ಮಿಸಲಾಗುವ ಯಾತ್ರಿ ನಿವಾಸದ ಯೋಜನೆಯ ಅನುದಾನ ಕಾರ‍್ಯಗತವಾಗದ ಕಾರಣಕ್ಕಾಗಿ ವಾಪಾಸಾಗುವ ಸೂಚನೆ ಇಲಾಖೆಯಿಂದ ದೇಗುಲಕ್ಕೆ ಬಂದಿದೆ.
ಸಚಿವ ಜನಾರ್ದನ ರೆಡ್ಡಿಯವರ ಮುತುವರ್ಜಿಯಿಂದ ಪ್ರವಾಸೋದ್ಯಮ ಇಲಾಖೆಯಿಂದ ಒಂದು ಕೋಟಿ ರೂ.ನಲ್ಲಿ ಯಾತ್ರಿ ನಿವಾಸ ನಿರ್ಮಿಸಲು ಅನುದಾನ ಮಂಜೂರಾಗಿತ್ತು. ಮೂರು ವರುಷಗಳ ಹಿಂದೆ ಇಪ್ಪತ್ತು ಆ ಬಳಿಕ ಮತ್ತೆ ಇಪ್ಪತ್ತು ಹೀಗೆ ಒಟ್ಟು ೪೦ಲಕ್ಷ ರೂ. ಜಿಲ್ಲಾಧಿಕಾರಿಗೆ ಬಿಡುಗಡೆಯಾಗಿತ್ತು. ಯೋಜನೆಗೆ ಇನ್ನೂ ಅಂದಾಜುಪಟ್ಟಿ ಆಗದೇ ಇರುವುದರಿಂದ ಕಾಮಗಾರಿ ಅವಧಿ ಒಳಗೆ ಆಗದೇ ಇರುವುದರಿಂದ ಅನುದಾನ ವಾಪಾಸು ಹೋಗುವ ಕುರಿತಾಗಿ ದೇಗುಲಕ್ಕೆ ಇಲಾಖೆಯಿಂದ ಪತ್ರ ಬಂದಿದೆ.
ಕಟೀಲಿನಲ್ಲಿ ನೂರು ಕೊಠಡಿಗಳ ಯಾತ್ರಿ ನಿವಾಸವೊಂದರ ಪ್ರಸ್ತಾವನೆ ಆಗಿ, ನಾಲ್ಕೈದು ವರ್ಷಗಳ ಬಳಿಕ ಒಂದು ಕೋಟಿಯ ಯೋಜನೆ ನಾಲ್ಕು ಕೋಟಿ ರೂ.ಗಳಿಗೆ ಏರಿ ಟೆಂಡರು ಕರೆದೂ ಆಗಿತ್ತು. ಅಷ್ಟಾಗುವಾಗ ಹಿಂದಿನ ಜಿಲ್ಲಾಧಿಕಾರಿ, ಯೋಜನೆಯ ವಿನ್ಯಾಸ ಸರಿಯಿಲ್ಲ, ಬದಲಾಯಿಸಿ ಎಂದು ಆದೇಶ ಕೊಟ್ಟ ಕಾರಣಕ್ಕೆ ಹೊಸ ಪ್ರಸ್ತಾವನೆ ಸಲ್ಲಿಸುವಂತಾಯಿತು. ಆದರೆ ಯೋಜನೆಯ ಮೊತ್ತ ನಾಲ್ಕರಿಂದ ಹನ್ನೊಂದು ಕೋಟಿಗೆ ಏರಿದ್ದು, ದೇಗುಲದಿಂದಲೇ ಇದಕ್ಕೆ ಹಣ ತೆಗೆಯುವುದು ಅಂತ ಚರ್ಚೆ ನಡೆಯುತ್ತಿದೆ.
ಪರಿಸ್ಥಿತಿ ಹೀಗಿರುವಾಗ ಪ್ರವಾಸೋದ್ಯಮ ಇಲಾಖೆಯಿಂದಲೇ ಪ್ರತ್ಯೇಕವಾಗಿ ಯಾತ್ರಿ ನಿವಾಸಕ್ಕೆ ಒಂದು ಕೋಟಿಯ ಯೋಜನೆ ಬಂದರೂ ಜಿಲ್ಲಾಧಿಕಾರಿ ಹಾಗೂ ಇತರ ಇಲಾಖೆಗಳ ನಿಧಾನಗತಿಯಿಂದಾಗಿ ಯೋಜನೆಯ ಮೊತ್ತ ಹಿಂದಕ್ಕೆ ಹೋಗುವ ಹಂತಕ್ಕೆ ಬಂದಿದೆ ಎನ್ನಲಾಗಿದೆ. ಇನ್ನಾದರೂ ಯೋಜನೆಗೆ ಚಾಲನೆ ಕೊಟ್ಟು ಅನುದಾನದ ಸದುಪಯೋಗ ಆದರೆ ಕಟೀಲು ದೇಗುಲದಲ್ಲಿರುವ ವಸತಿ ಸಮಸ್ಯೆಗೆ ಒಂದಿಷ್ಟಾದರೂ ಪರಿಹಾರ ಸಿಕ್ಕೀತು.

ಸಂಸ್ಕೃತ ಎಂಎ: ವಿಜಯಲಕ್ಷ್ಮೀಗೆ ರಾಂಕ್

ಕಟೀಲು : ಮಂಗಳೂರು ವಿವಿಯ ನಡೆಸಿದ ಸಂಸ್ಕೃತ ಎಂಎ ಪರೀಕ್ಷೆಯಲ್ಲಿ ಕಟೀಲು ಶ್ರೀ ದುರ್ಗಾ ಸಂಸ್ಕೃತ ಸ್ನಾತಕೋತ್ತರ ಕೇಂದ್ರದ ಕಾರ್ಕಳ ಜೋಡುಕಟ್ಟೆಯ ಶ್ರೀಮತಿ ವಿಜಯಲಕ್ಷ್ಮೀ ಕಾಮತ್ ಪ್ರಥಮ ರ‍್ಯಾಂಕ್ ಗಳಿಸಿದ್ದಾರೆ. ಇವರು ಪ್ರಸ್ತುತ ಕಾರ್ಕಳ ಎಸ್‌ವಿಟಿ ಪ್ರೌಢಶಾಲೆಯಲ್ಲಿ ಸಂಸ್ಕೃತ ಶಿಕ್ಷಕಿಯಾಗಿದ್ದಾರೆ.

ರೂ.೪ಕೋಟಿ ವೆಚ್ಚ ಕಟೀಲು ದೇಗುಲ ಮೂಲಸ್ಥಾನ ಕುದ್ರು ಜೀರ್ಣೋದ್ಧಾರಕ್ಕೆ ಚಾಲನೆ

ಕಟೀಲು : ಪುರಾಣ ಪ್ರಸಿದ್ಧ ಕಟೀಲು ಭ್ರಾಮರೀ ಶ್ರೀ ದುರ್ಗಾಪರಮೇಶ್ವರೀ ದೇಗುಲದ ಮೂಲಸ್ಥಾನ ಕುದ್ರುವಿನ ಜೀರ್ಣೋದ್ಧಾರಕ್ಕೆ ಶುಕ್ರವಾರ ಚಾಲನೆ ನೀಡಲಾಯಿತು.
ದೇಗುಲದಲ್ಲಿಡಲಾದ ಅಷ್ಟಮಂಗಲ ಪ್ರಶ್ನೆಯಲ್ಲಿ ಕಂಡು ಬಂದಂತೆ ಕುದ್ರುವನ್ನು ಜೀರ್ಣೋದ್ಧಾರ ನಡೆಸಲು ನಿರ್ಧರಿಸಲಾಗಿದ್ದು ಸುಮಾರು ರೂ.೪ಕೋಟಿಯ ಖರ್ಚನ್ನು ಅಂದಾಜಿಸಲಾಗಿದೆ.
ಯೋಜನೆಯ ಪ್ರಕಾರ ಶ್ರೀಬಂಧ ವಾಸ್ತು ಶೈಲಿಯಲ್ಲಿ ಕಾರ‍್ಯಗಳಾಗಲಿದ್ದು, ಮೂಲ ಲಿಂಗದ ಸ್ಥಳದಲ್ಲಿ ಮೇಲ್ಛಾವಣಿ ರಹಿತ ಗರ್ಭಗುಡಿ, ನಾಗ ದೇವರಿಗೆ ಚಿತ್ರಕೂಟ, ಬ್ರಹ್ಮಗುಡಿ, ಪಿಲಿಚಾಮುಂಡಿ ಗುಡಿ, ಪರಿಧಿ, ಎರಡು ಶಾಸ್ತ್ರೀಯವಾದ ಕೆರೆಗಳು, ಯಜ್ಞಶಾಲೆ, ಯಾಜ್ಞಿಕ ವೃಕ್ಷಗಳ ನೆಡುವಿಕೆಯ ಯೋಜನೆಗಳನ್ನು ಮೂರು ವರ್ಷಗಳ ಅವಧಿಯೊಳಗೆ ನಡೆಸಲಾಗುತ್ತದೆ. ಈಗಿರುವ ದೇಗುಲದಿಂದ ನದಿಯ ಇನ್ನೊಂದು ಪಕ್ಕದಲ್ಲಿರುವ ಕುದ್ರುವಿಗೆ ಹೋಗಲು ಸೇತುವೆಯನ್ನು ರೂ. ೧.೪೦ಕೋಟಿ ವೆಚ್ಚದಲ್ಲಿ ಸಣ್ಣ ನೀರಾವರಿ ಇಲಾಖೆಯಿಂದ ನಿರ್ಮಿಸಲಾಗುತ್ತದೆ.
ಕಾಮಗಾರಿ ಚಾಲನೆಯ ಸಂದರ್ಭ ದೇಗುಲದ ಶಿಬರೂರು ಹಯಗ್ರೀಯ ತಂತ್ರಿ, ಮೊಕ್ತೇಸರ ವಾಸುದೇವ ಆಸ್ರಣ್ಣ, ಅರ್ಚಕರಾದ ಆಸ್ರಣ್ಣ ಬಂಧುಗಳಾದ ಲಕ್ಷ್ಮೀನಾರಾಯಣ, ಅನಂತಪದ್ಮನಾಭ, ಹರಿನಾರಾಯಣದಾಸ, ಸಾಂಸದ ನಳಿನ್ ಕುಮಾರ್, ದಾನಿ ಸತೀಶ್ ಶೆಟ್ಟಿ ಪಡುಬಿದ್ರೆ, ವಾಸ್ತುಶಾಸ್ತ್ರಜ್ಞ ಸುಬ್ರಹ್ಮಣ್ಯ ಭಟ್, ಶಿಲ್ಪಿ ಎಲ್ಲೂರು ವಿಷ್ಣುಮೂರ್ತಿ ಭಟ್ ಮತ್ತಿತರರಿದ್ದರು.

ರೇಬೀಸ್ ಲಸಿಕೆ ನೀಡಿಕೆ

ಕಟೀಲು : ಮೆನ್ನಬೆಟ್ಟು ಗ್ರಾಮಪಂಚಾಯತ್ ವ್ಯಾಪ್ತಿಯ ಅಜಾರು, ಮಲ್ಲಿಗೆಅಂಗಡಿ, ಕೆಮ್ಮಡೆ, ಉಲ್ಲಂಜೆ ಪ್ರದೇಶಗಳಲ್ಲಿ ನೂರಕ್ಕೂ ಹೆಚ್ಚು ನಾಯಿ, ದನಗಳಿಗೆ ರೇಬೀಸ್ ಲಸಿಕೆಯನ್ನು ಕಿನ್ನಿಗೋಳಿ ರೋಟರ‍್ಯಾಕ್ಟ್, ಮೆನ್ನಬೆಟ್ಟು ಪಂಚಾಯತ್, ಪಶು ಇಲಾಖೆಯ ವತಿಯಿಂದ ನೀಡಲಾಯಿತು. ಡಾ.ಸತ್ಯಶಂಕರ್, ರೋಟರ‍್ಯಾಕ್ಟ್‌ನ ಗಣೇಶ್ ಕಾಮತ್, ಪಂಚಾಯತ್‌ನ ಶೈಲಾ ಶೆಟ್ಟಿ, ಅರುಣ್ ಕುಮಾರ್ ಮತ್ತಿತರರಿದ್ದರು. ಇತ್ತೀಚಿಗೆ ಕಟೀಲು ಪ್ರದೇಶದಲ್ಲಿ ಹುಚ್ಚು ನಾಯಿ ಕಡಿತ ಪ್ರಕರಣಗಳಾದ್ದರಿಂದ ಈ ಕಾರ‍್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು.

ಎಕ್ಕಾರು ವರ್ಷಾವಧಿ ನೇಮ

ಕಟೀಲು ಎಕ್ಕಾರು ಕೊಡಮಣಿತ್ತಾಯ ದೈವಸ್ಥಾನದಲ್ಲಿ ವರ್ಷಾವಧಿ ನೇಮ ನಡೆಯಿತು.